📘 Preparation Σιγμα.06 Amores I.2BC

ēn ego, confiteor, tua sum nova praeda, Cupīdō; 19
porrigimus victās ad tua iūra manūs. 20
nīl opus est bellō: pācem veniamque rogāmus; 21
nec tibi laus armīs victus inermis erō. 22
necte comam myrtō, māternās iunge columbās; 23
quī deceat, currum vītricus ipse dabit; 24
inque datō currū, populō clāmante triumphum, 25
stābis et adiunctās arte movēbis avēs. 26
dūcentur captī iuvenēs captaeque puellae: 27
haec tibi magnificus pompa triumphus erit 28
ipse ego, praeda recens, factum modo vulnus habēbō 29
et nova captīvā vincula mente feram. 30
Mens Bona dūcētur manibus post terga retortīs, 31
et Pudor, et castrīs quicquid Amōris obest. 32
omnia tē metuent, ad tē sua bracchia tendens 33
vulgus “iō” magnā vōce “triumphe” canet. 34
Blanditiae comitēs tibi erunt Errorque Furorque, 35
assiduē partēs turba secūta tuās. 36
hīs tū mīlitibus superās hominēsque deōsque; 37
haec tibi sī dēmās commoda, nūdus eris. 38
laeta triumphantī dē summō māter Olympō 39
plaudet et appositās sparget in ōra rosās. 40
tū pinnās gemmā, gemmā variante capillōs 41
ībis in aurātīs aureus ipse rotīs. 42
tum quoque nōn paucōs, sī tē bene nōvimus, ūrēs; 43
tum quoque praeteriens vulnera multa dabis. 44
nōn possunt, licet ipse velīs, cessāre sagittae; 45
fervida vīcīnō flamma vapōre nocet. 46
tālis erat domitā Bacchus Gangētide terrā: 47
tū gravis ālitibus, tigribus ille fuit. 48
ergō cum possim sacrī pars esse triumphī, 49
parce tuās in mē perdere, victor, opēs! 50
aspice cognātī fēlīcia Caesaris arma: 51
quā vīcit, victōs prōtegit ille manū. 52

This quiz requires you to log in.
Please enter your Quia username and password.
Quiz Log In

Username:
Password: