📘 Preparation Σιγμα.08 Amores I.3

Iusta precor: quae mē nūper praedāta puella est, 1
. . . . aut amet aut faciat, cūr ego semper amem. 2
ā, nimium voluī: tantum patiātur amārī; 3
. . . . audierit nostrās tot Cytherēa precēs. 4
accipe, per longōs tibi quī dēserviat annōs; 5
. . . . accipe, quī pūrā nōrit amāre fidē. 6
sī mē nōn veterum commendant magna parentum 7
. . . . nōmina, sī nostrī sanguinis auctor eques, 8
nec meus innumerīs renovātur campus arātrīs, 9
. . . . temperat et sumptūs parcus uterque parens: 10
at Phoebus comitēsque novem vītisque repertor 11
. . . . hāc faciunt, et mē quī tibi dōnat, Amor 12
et nullī cessūra fidēs, sine crīmine mōrēs, 13
. . . . nūdaque simplicitās, purpureusque pudor. 14
nōn mihi mille placent, nōn sum dēsultor amōris: 15
. . . . tū mihi, sī qua fidēs, cūra perennis eris; 16
tēcum, quōs dederint annōs mihi fīla sorōrum, 17
. . . . vīvere contingat tēque dolente morī! 18
tē mihi māteriem fēlīcem in carmina praebē: 19
. . . . prōvenient causā carmina digna suā. 20
carmine nōmen habent exterrita cornibus Īō 21
. . . . et quam flūmineā lūsit adulter ave, 22
quaeque super pontum simulātō vecta iuvencō 23
. . . . virgineā tenuit cornua vāra manū. 24
nōs quoque per tōtum pariter cantābimur orbem 25
. . . . iunctaque semper erunt nōmina nostra tuīs. 26

This quiz requires you to log in.
Please enter your Quia username and password.

Quiz Log In

Username:
Password: