🇽 Exit Assessment Ομικρον.05 Pro Caelio.13/14

[13] 1 Quis clāriōribus virīs quōdam tempore iūcundior, quis turpiōribus coniūnctior? 2 Quis cīvis meliōrum partium aliquandō, quis taetriōr hostis huic cīvitātī? 3 Quis in voluptātibus inquinātiōr, quis in labōribus patientiōr? 4 Quis in rapācitāte avāriōr, quis in largītiōne effūsiōr? 5 Illa vērō, iūdīcēs, in illō homine mīrābilia fuērunt, 6 comprehendere multōs amīcitiā, tuērī obsequīō, cum omnibus commūnicāre, quod habēbat, 7 servīre temporibus suōrum omnium pecūniā, grātiā, labōre corporis, scelere etiam, sī opus esset, et audāciā, versāre suam nātūram et regere ad tempus atque hūc et illūc torquēre ac flectere, 8cum tristibus sevērē, cum remissīs iūcundē, cum senibus graviter, cum iuventūte comiter, cum facinerōsīs audāciter, cum lībidinōsīs lūxuriōsē vīvere. [14] 1 Hāc ille tam variā multiplicīque nātūrā cum omnēs omnibus ex terrīs hominēs improbōs audācēsque collegerat, tum etiam multōs fortēs virōs et bonōs speciē quādam virtūtis assimulātae tenēbat. 2 Neque umquam ex illō dēlendī huius imperiī tam conscelerātus impetus exstitisset, nisi tot vitiōrum tanta īmmānitās quibusdam facultātis et patientiae rādīcibus nīterētur. 3 Quārē ista condiciō, iūdīcēs, respūātur, nec Catilīnae familiāritātis crīmen haereat; 4 est enim commūne cum multīs et cum quibusdam etiam bonīs. 5 Mē ipsum, mē, inquam, quondam paene ille dēcēpit, cum et cīvis mihi bonus et optimī cuiusque cupidus et firmus amīcus ac fidēlis vidērētur; 6 cuius ego facinora oculīs prius quam opiniōne, manibus ante quam suspīciōne dēprehendī. 7 Cuius in magnīs catervīs amīcōrum sī fuit etiam Caelius, magis est ut ipse moleste ferat errāsse sē, sīcutī nōn numquam in eōdem homine mē quoque errōris meī paenitet, quam ut istīus amīcitiae crīmen reformidet.

	Quiz Log In Username: Password: