Ars Amatoria: Lines 135-144
135 Nec tē nōbilium fugiat certāmen equōrum;
136 Multa capax populī commoda Circus habet.
137 Nīl opus est digitīs, per quōs arcāna loquāris,
138 Nec tibi per nūtūs accipienda nota est:
139 Proximus ā dominā, nullō prohibente, sedētō,
140 Iunge tuum laterī quā potes usque latus;
141 Et bene, quod cōgit, sī nōlīs, līnea iungī,
142 Quod tibi tangenda est lēge puella locī.
143 Hīc tibi quaerātur sociī sermōnis orīgō,
144 Et moveant prīmōs pūblica verba sonōs.
|
|
|
